आइतबार ०६ आषाढ २०७८

बलिउडलाई विश्वको दोस्रो ठूलो चलचित्र उद्योग भनिन्छ । यो उद्योगमा वर्षमा एक हजारभन्दा बढी चलचित्र निर्माण र प्रदर्शन हुने गरेका छन् । भारतमा ७ हजार सिंगल थिएटर र २१ सय मल्टीप्लेक्स छन् । छिमेकी मुलुकमा रहेको यति ठूलो बजारले नेपाली मेकरलाई पनि लोभ्याउने गरेको छ । यसैले त पछिल्लो समय नेपाली चलचित्रलाई हिन्दीमा डब गरेर भारत रिलिजको प्रयास भइरहेको छ ।

निर्देशक मिलन चाम्सले पनि ‘वीर विक्रम २’ लाई भारतका सिनेमा हलमा रिलिज गर्न दुई वर्ष अगाडि मुम्बईमा चलचित्रको हिन्दी डबिङ गरेका थिए । तर, कोरोनाका कारण बन्द भएका भारतका सिनेमा हल खुल्ने अनिश्चित भएपछि उनले अब भारतीय यूट्युब च्यानलबाट चलचित्र रिलिज गर्ने भएका छन् । एक महिनाभित्र चलचित्रको हिन्दी डब यूट्युबमा रिलिज हुने उनले बताए ।

उनले भने, ‘हामीले सिनेमा हलमा नै प्रदर्शन गर्ने गरी चलचित्रको हिन्दी डबिङ गरेका थियौं । तर, कोरोनाले भारतका सिनेमा हल अनिश्चितकालका लागि बन्द भएका छन् । अब यूट्युबमै चलचित्र रिलिज गर्दैछौं । चलचित्रको हिन्दी डब निकै राम्रो भएको छ ।’ उनले आफ्नो फेसबुकमा अभिनेत्री वर्षा सिवाकोटी र अभिनेता पल शाहबीचको संवाद हिन्दीमा स्वरांकन भएको दृश्य शेयर गरेका छन् ।

साउथ चलचित्रको हिन्दी डबिङ गर्ने कलाकारहरुले ‘वीर विक्रम २’ मा भ्वाइस ओभर गरेको चाम्सले बताए । यो चलचित्र नेपालका सिनेमा हलसँगै यूट्युबमा सार्वजनिक भइसकेको छ । बाल्यकालदेखिका दुई साथीको भावनात्मक सम्बन्धको कथामा चलचित्र आधारित छ । चलचित्रमा पल र वर्षासँगै नाजिर हुसेन, बुद्दि तामाङ, देशभक्त खनालको पनि मुख्य भूमिका रहेको छ ।

६३ पटक हेरिएको

तपाईको प्रतिक्रिया