काठमाडौं। भोलिदेखि उपत्यका छाड्न नपाइने भएको छ । थप एकसाता निषेधाज्ञा लम्ब्याउने निर्णयसँगै उपत्यकाका तीनैवटा जिल्ला प्रशासनले यस्तो नियम ल्याएका हुन्। निषेधाज्ञा उल्लंघन गर्दै उपत्यका बाहिर जान नपाइने उनीहरुको निर्णय छ । काठमाडौं उपत्यका छोड्नैपने भएमा स्थानीय तहको सिफारिस अनिवार्य हुनुपर्ने निर्णय गरिएको छ।
मंगलबार उपत्यकाका काठमाडौं, ललितपुर र भक्तपुर जिल्लाका प्रमुख जिल्ला अधिकारीहरुको बैठकले बैशाख २९ गतेसम्म निषेधाज्ञा लम्ब्याउने निर्णय गरेको छ । जारी निषेधाज्ञालाई थप कडा बनाउनेसहितका नियम उनीहरुले ल्याएका छन्। उपत्यकाबाहिर जानको लागि सम्बन्धित स्थानीय तहले १० दिन क्वारेन्टिन राख्ने प्रतिबद्धतासहितको सिफारिसका आधारमा मात्र जान दिने सीडीओहरुको निर्णय छ।
